2016-imi isertitat 4,8 pct.-imik qaffassimapput

2016-imi innuttaasut 14-it sinnerlugu ukiullit agguaqatigiissillugu tamakkiisumik 240.000 kr.-inik isertitaqarsimapput. 2015-imut naleqqiullugu 11.000 kr.-inik amerlanerupput, tassa 4,8 pct.-inik qaffariarnerluni, 2015-imi isertitat annertusinerat 2016-imi ingerlaqqiinnarpoq.

Immikkoortortaqarfimmi Ilulissani (siusinnerusukkut kommuniusimasumi) isertitat qaffannerpaasimapput, tassani agguaqatigiissillugu isertitat 10,9 pct.-imik qaffassimapput. Qaasiuitsup Kommuniani immikkoortortaqarfinni allani aamma isertitat qaffangaatiarsimapput, agguaqatigiissillugu isertitat taakkunani 8 pct.-i sinnerlugu qaffassimapput. 2016-imi immikkoortortaqarfimmi Nuummi agguaqatigiissillugu tamakkiisumik isertitat 312.000 kr.-iullutik qaffasinnerpaajusimapput, siusinnerusukkut immikkoortortaqarfimmi Nuummi isertitat aamma qaffasinnerusarsimapput.

 

Immikkoortortaqarfinni pingasuni agguaqatigiissillugu isertitat ikililaarsimapput. Immikkoortortaqarfimmi Qaanaami isertitakinnerpaaffioreersumi agguaqatigiissillugu appariarfiunerpaaffiuvoq, tassani isertitat agguaqatigiissillugu 1,4 pct.-imik apparsimapput. 2016-imi immikkoortortaqarfimmi Qaanaami agguaqatigiissillugu tamakkiisumik isertitat 137.000 kr.-iusimapput.

 

Tabel 1. 2014-imiit 2016-imut immikkoortortaqarfinni agguaqatigiissillugu tamakkiisumik isertitat

	2014	2015	2016	Allannguut 2015-2016
	1.000 kr.			Pct.
Nuna tamakkerlugu .............	218	229	240	4,8
Nanortalik....................	145	152	160	5,4
Qaqortoq.....................	194	209	216	3,2
Narsaq.......................	175	182	182	-0,3
Paamiut......................	171	176	177	0,5
Nuuk.........................	290	305	312	2,4
Maniitsoq.....................	189	205	220	7,7
Sisimiut......................	228	238	250	5,1
Kangaatsiaq...................	140	141	153	8,3
Aasiaat.......................	176	182	193	5,9
Qasigiannguit..................	181	187	202	8,5
Ilulissat.......................	210	214	238	10,9
Qeqertarsuaq..................	186	196	206	5,0
Uummannaq..................	184	197	214	8,4
Upernavik.....................	158	159	173	8,8
Qaanaaq.....................	137	139	137	-1,4
Tasiilaq.......................	152	155	162	5,0
Ittoqqortoormiit................	168	182	180	-0,8
Najoqqutaq: Kisitsisaataasivik. http://bank.stat.gl/INNP2

 

Piffissami pineqartumi akit qaffarujussuarsimanngillat, taamaasilluni isertitat pisissutaasinnaasut 2015-imiit 2016-imut qaffassimapput. Innuttaasut isertitaat pisissutaasinnaasut qaffangaatiarsimanerat Titartakkami 1-imi takuneqarsinnaavoq, Naatsorsueqqissaartarfiup kisitsisaatigisaani isertitat pisissutaasinnaasut aatsaat taamak qaffasitsigipput.

 

Titartagaq 1. Isertitat pisissutaasinnaasut naleqqersuutaasa ineriartornerat 2002-2016

 

Naatsorsueqqissaartarfiup saqqummerseqqammisaani 2016-imi isertitat –mi innuttaasut isertitaat annertunerusumik misissuataarneqarsinnaapput. Saqqummersitaq inuit isertitaannik, inoqutigiit akileraarutaannik aammalu inoqutigiit isertitai tunngavigalugit agguaanneqarnerinik naatsorsuutinik imaqarpoq. Kisitsisitigut paasissutissat nammineerluni nalunaarsuiffinniit kisitsisit atorlugit suliaavoq, isertat nalunaarutigineqarsimasut tamarmik atorneqarput – sulinermi aningaasarsiat taamaallaat tunngavigineqanngillat. Taamaattumik kisitsisitigut paasissutissat sulinermi aningaasarsianut paasissutissanut paarlaanneqarsinnaanngillat.

 

Naatsorsueqqissaartarfiup nittartagaani www.stat.gl–imi saqqummersitaq atuarneqarsinnaallunilu pdf-inngorlugu aaneqarsinnaavoq. Periarfissaavortaaq Naatsorsueqqissaartarfiup Kisitsisaataasiviani bank.stat.gl–imi isertitat kisitsisitigut paasissutissaanni tabelinik nammineq toqqartukkanik annertunerusunik aallertoqarsinnaanera.

 

Annertunerusumik paasisaqarnerorusuttunut Naatsorsueqqissaartarfiup ittua Anders Blaaberg oqarasuaat 34 57 81 innersuussutigineqarpoq